Maharashtra Government : जागतिक बँकेने कोल्हापूर आणि सांगली जिल्ह्यातील पुराचे पाणी नियंत्रित करण्यासाठी आणि ते इतर दुष्काळग्रस्त भागात वळवण्यासाठी राज्य सरकारच्या महाराष्ट्र हवामान लवचिकता विकास प्रकल्पाच्या पहिल्या टप्प्यात 4,000 कोटी रुपयांचा निधी मंजूर केला आहे. मंगळवारी (दि. 13) मुंबईतील ‘मित्र’ कार्यालयात मुख्यमंत्री एकनाथ शिंदे यांच्या अध्यक्षतेखाली महत्त्वाची बैठक होणार असल्याची माहिती मित्राचे उपाध्यक्ष राजेश क्षीरसागर यांनी पत्रकार परिषदेत दिली.
या बैठकीनंतर 14 व 15 तारखेला समिती पाहणीसाठी येणार आहे. त्यानंतर जास्तीत जास्त सहा महिन्यांत काम सुरू होईल. 2025 मध्ये पुराचे पाणी वळवण्याची योजना असल्याचेही ते म्हणाले. क्षीरसागर म्हणाले, ‘जिल्ह्याला चार वेळा पुराचा फटका बसला. प्रत्येक वेळी पातळी वाढल्याने कोल्हापूर, इचलकरंजी शहरे तसेच करवीर, हातकणंगले, शिरोळ तालुक्यातील अनेक गावे जलमय झाली. पूर नियंत्रणाबाबत जलसंपदा विभागामार्फत महाराष्ट्र हवामान लवचिकता विकास कार्यक्रमांतर्गत योजना तयार करण्यात आली आहे. त्याचे दोन टप्पे आहेत, कोल्हापूर आणि सांगली जिल्ह्यांतील पूर नियंत्रण आणि पुराचे पाणी पश्चिम महाराष्ट्रातील दुष्काळग्रस्त भागात वळवणे.
जागतिक बँकेने पहिल्या टप्प्यासाठी 4 हजार कोटी रुपयांचा निधी मंजूर केला आहे. यामध्ये पूर नियंत्रणाची कामे, उड्डाणपूल, भूस्खलन उपाययोजना, पॉवर लाइन रिलोकेशन, ऐतिहासिक आणि सांस्कृतिक वारसा स्थळांचे संरक्षण, पूर अंदाज यंत्रणा, आपत्ती व्यवस्थापन साधने, पूर संरक्षण उपाय इत्यादींचा समावेश असेल. यामध्ये जागतिक बँकेचा 70 टक्के तर राज्य सरकारचा 30 टक्के हिस्सा आहे. क्षीरसागर म्हणाले की, दुसऱ्या टप्प्यात पुराचे पाणी टंचाईग्रस्त भागाकडे वळविण्यासाठी आवश्यक त्या उपाययोजना केल्या जातील, पंपाचे पाणी पाईपलाईनद्वारे संबंधित भागात नेले जाईल.